АМЬДРАЛ, ХАЙР, АЗ ЖАРГАЛ

Яг жилийн өмнөх бичлэг дахин оруулж байна. Цаг хугацаа гэж ямар ч хурдан өнгөрнө вэ? Цаг хугацаа харвасан сум мэт өнгөрөв одовч Миний сайхан аав охиныхоо дэргэд түшиг тулгуур нь болон хазайхад минь түшиж, халтирахад минь хөтөлсөөр явааа. Таныхаа халуухан гараас хөтлөөд намрын энэ л зэвэргэн өдрүүдэд тандаа л эрхлэн алхахсааан.

Аав минь тэнгэрээс охиноо харж л байгаа даа.  Өмнө Бурхан аавынхаа тухай нэг бичлэг оруулж байсан. Одоогоос олоон жилийн өмнө намрын нэг зэврүүн өдөр хүргэн ахаасаа аймшигт мэдээ дуулаад тэнгэр хол газар хатуу ганцаараа уйлаад л, уйлахаас өөрийг хийж чадахгүй сууж байж билээ.  

Ээж эгч ах нар маань бүгд аавыг маань  эмчилгээнд аваад явчихсан. Би л гэрээ сахин үлдсэн байсан юм даг. Ээжийгээ бурхан болсон аймшигт мэдээг сонсохдоо бас л ганцаараа байсан. Яагаад тэгсэн юм бол доо.

Тэр жил манай нутагт зуншлага ямар сайхан байсан гээч. Бороо хур ихтэй өвс ногоо халиурсан сайхан жил байсан. Хавар их сургуулийн элсэлтийн шалгалт өгөхөөр Улаанбаатар яваад шалгалтандаа ч тэнцсэн юмгүй Чойр, Улаан-Уул, Замын-Үүд, Эрээн гэж зугаалж яваад нэг сар болоод ирэхэд аав минь ямар их өөрчлөгдсөн байлаа даа. Аав минь надаар дандаа толгой, мөрөө бариулна. Намайг ирэнгүүт л за миний охин нэг сайхан бариадах гээд л. Би аавынхаа толгой мөрийг бариад хуяанг нь гар луу нь хөөн буулгаж байхдаа өөрийн эрхгүй уйлчихаж билээ. Булчин шөрмөс нь зангиран байдаг тэр гар  мөн гэж үү гэж бодоод л. 

Тэр үед даанч юм мэдэхгүй тэнэг охин байж дээ. Аавыг минь аймгийн эмнэлэг зүрх, улаан хоолойн үрэвсэл гээд эмчилгээ хийсэн ч тэр онош нь буруу байсан юм.  Улаанбаатарт эмнэлэгт үзүүлэхээр ирэхэд нэгэнт оройтсон байсан юм билээ. Үүнийг ганцхан ахад минь л хэлсэн байсан даа.

Жил жилийн энэ л өдөр сайхан ааваа дурсан хүүхэд багачуудыг баярлуулахаас өөрийг хийж чадахгүй болсон би хайртай аавыгаа үр хүүхэд биднийгээ тэнгэрээс харан амьдралд алдах үед нь тулгуур болж, гуньж гутрах үед биднийг сэргээж, биднийхээ буян заяаг түшиж яваа гэдэгт итгэдэг ээ.

Ижий минь ч аавтай минь уулзаад хоёулаа бурханы орондоо үр хүүхэд биднийгээ хараад л сууж байгаа гэдэгт итгэнэм. Хүүхэд байхад өглөөгүүр аав ээж хоёрынхоо дүнгэр дүнгэр ярихыг сонсоод ямар их түвэгшээдэг байв даа. Аав ээж хоёр минь одоо охиныхоо хажууд тэгээд нэг ярьдаг ч болоосой. Хайртай та хоёрынхоо тэр намуухан яриаг чагнаад унтаа сэрүүн хоёрын дунд жаргалдаа мансууран хэвтэхсэн.

Охин нь та хоёртоо дэндүү их хайртай ч ачыг тань өчүүхэн боловч хариулж чадаагүйдээ одоо ч харамсдаг. Гэлээ гээд ертөнцийн жамыг яалтай. Та хоёрын минь үргэлжлэл болсон үр хүүхдээ л сайн хүн болгон хүмүүжүүлж өсгөхөөс өөрийг хийж үл чадна.

Аав ээж хоёр минь тэнгэрээс охиноо харж л байгаа даа. Охин нь та хоёрынхоо санааг чилээхгүй аз жаргалтай амьдарнаа.